Jam’iyyar PDP ta yabawa tsohon gwamnan jihar Kano, Rabiu Musa Kwankwaso kan rawar da ya taka a lokacin zaben gwamnan jihar Edo, tana mai cewa tana alfahari da shi.
Jam’iyyar ta ce kokarinsa da kuma gudummawar da ya bayar ne ya sa ta samu nasara a jihar Edo.
Sakataren jam’iyyar PDP na kasa, Sanata Umaru Ibrahim Tsauri, ya yi wannan yabo ne a wata karamar wasika da ya aika wa Kwankwaso, mai dauke da kwanan watan 21 ga Satumbar 2020, mai taken: ‘Wasikar yabo da jinjina”, wanda aka saki ga manema labarai a Abuja ranar Lahadi.
Wasikar ta ce, “Bayan kyawawan kamfen da kuma nasarar zaben gwamna a Jihar Edo, Kwamitin Aiki na Kasa (NWC) na babbar jam’iyyarmu (PDP) ya sake nazarin gudummawar ku game da nasarar da aka samu.
“Irin kwazon ku, taimakon da kuka bayar, gudummawar ku ta ɗan adam, ta kayan aiki da kuma goyon baya sun ba da gudummawa matuka yayin zaɓen.
“Shugabancin jam’iyya na matukar alfahari da ku kuma a koyaushe za su ji daɗin kasancewa tare da ku da nasarorin da kuka samu.
“Kwamitin Aiki na Kasa (NWC) yana yin addu’ar Allah Madaukakin Sarki ya albarkace ku a kowane lokaci.
“Kamar yadda muka tashi zuwa Ondo, muna roko a gare shi ya ba ku lafiya, ƙarfi, ƙarfin zuciya da hikima don yin abin da ya fi wanda kuka yi a Edo, don haka mu sa Ondo ya fado cikin PDP, Amin.
Allah Ya Baku Albarka. ”
